Ajo doli nga shtëpia e krekosur, siç bënte gjithnjë. Edhe pse jashtë binte një shi i zymtë dhe era e përkeqësonte edhe më shumë situatën, me delikatesë ajo veshi getat e saj të preferuara. Ato që i kish blerë shumë shtrenjtë në një butik andej nga Komuna e Parisit, ku punonte një shoqja e saj, të dyja të diplomuara dhe me master pranë Fakultetit të Drejtësisë. Getat kishin një dizajn të veçantë - një kullë Eiffel nëpër të, që i bënte edhe më ekzotike në një vend ku ndërtesa më e lartë ishte një kullë - element i lidhur fort në ndërgjegjen kombëtare për shkak të gjakmarrjes - në formë kaushi akullore, afër një ushtari, të panjohur.
Hijeshisë së getave i shtoi një fund të
zi, të shkurtër e elegant, duke e kombinuar me një këmishë ngjyrë kremi, që
edhe pse ish veshur nja tri-katër herë, nuk kishte njolla të dukshme a kutërbim
djerse. Kaçurrelat me majë të djegur i lëshoi mbi supe dhe vendosi edhe një
palë rruaza të kuqe të ndezura, për të krijuar atë kontrastin që duhej.
"Voila" tha me vete teksa veshi edhe këpucët, natyrisht dhe
vetëm me takë "20çe". Edhe pse i vrisnin pak këmbët, e në darkë
detyrohej të rrinte për dy orë me këmbët më legen me ujë të vakët e kripë të
blerë shumë shtrenjtë në një dyqan importi pranë një restoranti dhe një
ëmbëltoreje (Te Rossman dmth), ato taka e tregonin shumë seksi. Dhe shkonin shumë me
getat për më tepër.
Hapi perdet për të parë kohën për herë
të fundit përpara se të dilte. Nga hapësira që ndërtesa e re e Avdiut, komshiut
të saj përballë, e lejonte të shihte, vuri re një shi të dendur. "Perfekte
për çadrën e kuqe" mendoi, edhe pse ajo kishte një logo banke - aty ku
kishte marrë overdraftin - të stampuar në të.
Hodhi parfumin e saj të preferuar që e
kishte blerë shumë shtrenjtë diku andej nga Brryli dhe doli. Mbylli derën dy
herë me bravën e poshtme dhe dy herë me atë të sipërme. Kohët e fundit ishin
bërë nja dy vjedhje në lagje (ca saraçineska, nja dy brava hekuri dyersh për
skrap dhe tri herë shtëpia e Benit, por ai kish lekë e nuk e çante kokën).
Zbriti pesë katet e pallatit të vjetër pa ashensor duke përshëndetur
përzemërsisht plakat e lagjjes që qenë ulur duke bërë dallavere e duke tjerrë
lesh në shkallët e katit të dytë.
22 minutat e para - koha që i duhej për
të dalë në rrugë kryesore - i morën mëndjen gropat që duhet të evitonte, copat
e pllakave ku duhet të shkelte si dhe pusetat pa kapak (edhe këto të vjedhura
për skrap). Edhe ato dy puseta që kishin kapak, mund të ishin një kurth
vdekjeprurës për shkak të vrimave ku mund të ngecnin takat.
Në 22 minuta dëgjoi 6 fishkëllima të ndryshme, 3 "o të hënksha zëmbrën moj", 4 bori makinash dhe 2 motorrë papaq.
Në 22 minuta dëgjoi 6 fishkëllima të ndryshme, 3 "o të hënksha zëmbrën moj", 4 bori makinash dhe 2 motorrë papaq.
Edhe pse vizualisht shfaqi shenja
nervozizmi dhe bezdie (ca nga baleti mes baltes e ca nga epshet e lëshuara si
pa të keq rrugës), brenda vetes po ndjehej mirë. Ajo tashmë kish vëmendjen e
rrugës së lagjjes. Kjo tregonte se jo vetëm ajo ish perri mbi perrie, por edhe
se ish veshur më bukur nga ç'mendonte.
Doli më në fund në rrugën kryesore e po
priste të vinte Tirana e Re. Do të ikte në Laprakë për të pirë një kafe me një
mikun e saj që kishte servis makinash në atë zonë. Ishin njohur në Fejsbuk. Ky
i kishte komentuar një foto. Kjo i kishte bërë një lajk tek një foto ku ishte
ky me një kartmonedhë 500€ dhe një pistoletë. Kaq mjaftoi që të shpërthente një
dashuri e fortë. Dashuri nga ato me shikim të tretë a të katërt, sa të mësohesh
me pamjen e tjetrit/ës.
Autobusi ishte plot. Njerëz që
shtyheshin. Fatorino që bërtiste herë "Më
shpejt, më shpejt. Hajde më shpejt", hërë "Lëviz nga mesi të lutem". Ca me brryla e ca me forcë, u bë
edhe ajo pjesë e turrmës që do të bënte xhiro rrugëve të unazës së re, ku
gjithë qejf mund të shijosh masakrën e betonit.
Me Xhinon e servisit nuk kishin shumë që
flisnin. Dukej çun i mirë. Të dy ndanin pasionin për motorrat si dhe dëshirën
për të bërë një jetë luksi, kryesisht të shoqëruar me check-in tek Mumja,
Lolipopi dhe lokalet e reja që hapeshin, ku vente vetëm ajka e shoqërisë.
Mendimet e kësaj jete të lumtur, që po i
shoqëronte në mënyrë instiktive me një buzëqeshje të kufizuar (që të mos
ekspozonte kariesin që kishte në dy dhëmbët e sipërm), u ndërprenë zhurmshëm
nga një debat që një udhëtar po bente me fatorinon. Udhëtari donte biletë dhe
po i thoshte që është evazion fiskal. Fatorino nga ana e vetë po i shpjegonte
se ishte zgjuar që në 6 të mëngjesit dhe nuk kishte kontrollorë gjatë rrugës.
"Kafshët" mendoi me vete.
"Këta sikur dalin t'i prishin punë njerëzvë që punojnë mo. Po ç'të ka bërë
fatorino i shkretë? Leqë ça e do kot biletën njëherë".
Zbriti në stacionin e Laprakës. Semafori
për të kaluar rrugën ishte veç 25 metra më tej, por të gjithë kaluan aty ku
ndaloi autobusi, madje përpara këtij të fundit. Fundja, kështu e bënin të
gjithë. Edhe Bashkia ja kishte futur kot. Po bëje mër vlla semaforin aty ku do të
kalojë robi. Po ata janë të gjithë të korruptuar, prandaj nuk ecin gjërat në
këtë vend.
U takua me Xhinon te Bar Lapraka, në kat
të dytë, në fund, pas shtyllës. Se duhet çik intimitet në këto raste. As vetë
ajo nuk e di se si ikën dy orë duke dëgjuar historitë e sherrit të Xhinos me
njerëz që i kishin rënë më qafë, se Xhinua vetë ish çun i mirë që nuk bënte
padrejtësi në jetë.
E në ato pak orë që ndejtën bashkë, ndërkohë
që ai i fërkonte ca shalën, se çun ishte në fund të fundit, ajo mendonte se si
kishte humbur kohë më parë me meshkuj që as te maja e thoit nuk i afroheshin
Xhinos. E kështu vijoi të thurrte ëndrra mbi të ardhmen e tyre të lumtur.
Pa orën e shqetësuar. I duhej të lëvizte
sa më shpejtë të ishte e mundur, sepse shoqja e saj, Roberta, po e priste.
Nxitoi të nxirrte protofolin, por princi i kaltër kishte paguar tashmë, kur kjo
kish ikur në tualet për të kontrolluar grimin e për të vënë ca më shumë rouge në
mollëza. Buzëqeshi e ndrojtur dhe nxitoi të dilte përpara nga lokali, se
helbete ç’do thoshte njerëzia po t’i shihte bashkë.
Rrugës për te Roberta, pasi kaloi Bar
Restorant Mezeri “Pirro Buzë Rrugës”, iu hap oreksi nga era e qofteve që vinte
nga lokali. Pa e menduar gjatë, u fut në Fast-foodin e parë që gjeti. Punonjëset
u habitën ca, se kish kohë që nuk hynte njeri aty. Gjithësesi, i përgatitën një
sufllaqe me të gjitha, pa qepë dhe pa salca, të standardeve më të larta që
ofronin. Sepse klienti ka gjithmonë të drejtë!
Nxitoi të kalonte rrugën dhe takoi
Robertën në lokalin poshtë punës. Roberta, që në të vërtetë emrin e kishte
Novruze (sepse kishte lindur ditën e Shën Novruzit), njihej ndryshe edhe Xela,
por vetëm nga shoqet e saj më të mira. Pas një kafe të gjerbur shpejt e shpejtë,
duke dëgjuar hallet e Xelës me prindërit që nuk i dërgonin lekë nga Përroi i Vërsidollit
në Devoll, ku jetonin tashmë prej gjithë jetës së tyre, u ngjitën të dyja lart
në punë. Supervizori i katit as nuk u la kohë gocave të vendosnin kufjet, se
filloi menjëherë të bërtiste “Dai
ragazze, dai. Contrati oggi e, mi racomando”. Sa i lig që ishte mër për
Zotin. E kishte rrogën vetë nja 1 milion, prandaj bënte ashtu. Se nuk e dinte i
shkreti se ç’hiqnin gocat për të bërë atë punë.
Pas 6 orësh monolog “Ciao Signore. Sono Francesca e la chiamo da
Roma”, turni u mbyll dhe gocat u sulën për të kapur përsëri autobusin për në
shtëpi. Gjatë rrugës, përsëri të njëjtat muhabete, ankesa, zëra të lartë. Këta
njerëz sikur nuk punonin mi xhane. Zbriti në lagjje dhe nxitoi të bënte rrugën
pak më shpejtë, se ishte errësuar. Shyqyr që kishte smartphonin e vetë, ku hapi
0.facebook.com që të shihte nëse
Xhino i kish bërë ndonjë mesazh a jo. Edhe pse pak e mërzitur, e justifikoi me
veten “Do ketë qënë i zënë i shkreti”.
Përshëndeti përsëri plakat e shkallës së
dytë që nuk kishin mbaruar as me dallaveret as me leshin e tjerrur dhe hyri në
shtëpi.
Më në fund, pas një dite intensive, hoqi
e lehtësuar këpucët dhe filloi të mbushte një legen me ujë të vakët. Pasi u ndërrua
e veshi rrobat e shtëpisë, hodhi një batanije sipër e filloi të rrotullonte kot
stacionet televizive. TVSH – Tirana TV – TV Klan – Ora News – News 24 – Top
Channel – Albanian Screen – NTV – BBF... asnjë gjë interesante. Edhe “Haberet e
Darkës” te Tirana TV nisnin më vonë.
E ashtu siç ishte, ndjeu se gjumi po e
merrte dalëngadalë ... në fund të fundit kishte pasur një ditë intensive ...
dhe nesër do të ishte një ditë e re për të mes (Komunës së) Parisit...
0 komente:
Post a Comment