Kam disa ditë që nuk po fle gjumë. Nuk është nga
vapa, as nga ëndrrat. Është çështja e presidentit të ardhshëm të Shqipërisë. Në
kokë më qarkullojnë shumë emra. Xhozi, Xhufi, Tan’ Ceka, Nano ...
Kjo çështja e presidentit është me të vërtetë çështje
shumë serioze. Madje, më serioze edhe se çfarë ka bërë Klaudia brenda Big Bradhërit;
a ka kapur apo jo naçu i lagjes sime një dashnore tek Petro Nini apo 100
vjetori i Pavarësisë.
Ndërkohë, Republic of AlBanania lundron e lumtur në detin e qetë të rritjes ekonomike hipergalopante
pas Gjermanisë; mirëqënia e pop’llit hahet kokë-më-kokë me Norvegjinë; Anglisë
po ja fusim për nga moti dhe të mos harrojmë që jemi një Zvicër e vogël (feat. Independent Self-Regulating Republic of
Lazarat). Kësaj i thonë “Të dhjefsha mu n’Europë”.
Nuk kemi probleme me ekonominë. Edhe ndonjë
muhabetëz tek-tuk që demek na qënkërka shtrënguar leku, nuk është veçse
provokim i serbve ose grekërve, që janë xheloza dreqi ndaj mirësisë që rrezaton
vendi i (shqi)Ponjave. Le që pastaj edhe lideri shpirtëror i shqiptarëve, Gena,
e ka thënë shumë qartë, “Më mirë me ty dhe fukara, sesa pa ty i pasur”. Për më
tepër, dihet që, një ekonomi që varet nga Apex-et, TeleBingo-t dhe EuroLlotot është
plotësisht e konsoliduar.
Sigurinë e kemi maksimale. Këto vjedhjet e voçkla
që janë 300 fishuar kohët e fundit, përveç se pasqyrojnë politikën zyrtare të
rritjes së çfarëdo lloj gjëje me 2-3 shifra, është edhe për syrin e keq. Edhe Ministrja
e Kulturës dhe Muzikës së Shqipërisë, Znj. Babeta Shahini, e ka deklaruar në një
konferencë për shtyp me dyer të mbyllura se “Jari nani nani nani / i ngaterron punet shejtani / me mire syri sesa nami”. Nuk po përfshijmë në statistika ata
individë që: a) testojnë shkathtësinë e tyre brenda linjave të transportit
publik përsa i përket një zotërimi të përkohshëm të portofolit/celularit/sende
me vlerë të një individi tjetër; b) vuajnë nga kleptomania – shoqëruar me recetën
përkatëse nga mjeku, të cilit ja kanë vjedhur, për sa kohë janë kleptomanë ...;
c) duan që të evidentojnë ndonjë mungesë kujdesi dhe vigjilence nga ana e
individëve të tjerë. Në fund të fundit, “Lumi fle, xhepisti nuk fle”
Ka disa zëra, që kinse ne Shqiptarët paskërkemi
probleme me edukimin dhe sidomos braktisjen e shkollave për të punuar që në
moshë të re. Të bindur të jenë të gjithë që, është zhdukur plotësisht
analfabetizmi – edhe të duash, nuk të lë Bashkim Hoxha injorant – dhe ata që
punojnë, e kanë sepse kanë vesin e keq që duan vetëm të punojnë. U ka hyrë në
gjak ky muhabet. Kur të jepet mundësia, përse të mos e bësh në fund të fundit?
Gjithësesi, për t’u rikthyer tek tema kryesore
shqetësuese, kjo çështja e presidentit duhet të zgjidhet me urgjencë. Thonë që
Nano e paska si më të thjeshtë, sidomos pas takimeve që pati me Berishën, Ramën,
Sindikatën e Gjysheve Politikisht të Pavarura dhe Metën. Por as kjo nuk është e
sigurt. Në mos, është ndonjë nga ato perlat që fabrikohen thjeshtë fare në
media e më gjërë. Statistikisht, perla të tilla përbëjnë rreth 46% të GDP-së në
Shqipëri.
Për ta mbyllur këtë intro të gjatë, ja edhe një
përmbledhje:
Nano 1/1 1.3
Xhozi 1/x 2.4
Ceka 2/2 5.7
Shënim: Çdo referim përgjatë materialit është
i rastësishëm. Nano, Berisha, Rama, Xhufi, Ceka, Gjyshet e Bashkuara, Gena apo
Babeta nuk ekzistojnë në të vërtetë, janë thjeshtë faktorë psikologjikë.
1 komente
une them se ka per te vajtur me ndeshje vajtje ardhje ska per te qene nje takim....
ReplyDelete